Skinnsemi - Cabaret

Um viðburðinn

Volcano sirkushátíð 4.-14.júlí 2013

Skinnsemi - fullorðinssirkus / miðnæturkabarett

Sirkús Íslands hefur lengi sett upp vinsælar fjölskyldusýningar en vorið 2011 ákvað sirkúsinn að prófa að gera sýningu sem væri eingöngu fyrir fullorðna. Það gekk svo vel að nú eru haldin regluleg fulorðinssirkúskvöld sem kallast Skinnsemi - því þar er oft sýnt svo mikið skinn. Sýningin er kabarettsýning með sirkúsívafi - þar sem lagt er upp úr fullorðinshúmor. Innblástur er sóttur í burlesque- og vaudeville-sýningar þriðja og fjórða áratugarins, en formið var endurvakið á tíunda áratugnum í Bandaríkjunum. Loftfimleikar, eldur, spandex, pleður, óvenjuleg tónlistaratriði, lista- og lostamenn, húllahringir, trúðslæti.... og allt fullorðins.

Umsagnir áhorfenda:
"Þetta var miklu meira en skemmtilegt. Ég er hér með komin í harðkjarnahóp aðdáenda." - Guðrún Eva Mínervudóttir, rithöfundur

"Djöfull var þetta gaman, ég gat ekki sofnað í 3 daga útaf hláturskrömpum og harðsperrum í brosvöðvunum." - Hörður Sveinsson, ljósmyndari

"Ég mæli heils hugar með þessari kvöldstund í félagsskap hálfnakins fólks sem fettir sig og brettir á ögrandi og siðferðislega vafasaman hátt. Blygðunarkennd mín naut kvöldsins til fullnustu." - Atli Freyr Steinþórsson, útvarpsþulur og bóhem

"Þetta kvöld var stórsnilld. Ég hef sjaldan hlegið eins mikið að berrössuðu fólki. Af hverju eru ekki fleiri að gera svona sniðugt?" - Jón Eðvald Vignisson, internetprins og plötusnúður